លោក រុន បូរាំង

ចាងហ្វាងក្រោមមត្តេយ្យសិក្សា ដល់មធ្យមសិក្សាទុតិយភូមិ សាខាតាកែវ

សូមស្វាគមន៍ការមកកាន់សាលារៀន អន្តរទ្វីប អាមេរិកាំង សាខាតាកែវ!

តាងនាមឱ្យសាលារៀន អន្តរទ្វីប អាមេរិកាំង ខ្ញុំពិតជាមានសេចក្តីសោមនស្សរីករាយ និងសូមគោរពស្វាគមន៍ចំពោះទ្រង់ឯកឧត្តម លោកជំទាវ លោក លោកស្រីដែលជាមាតាបិតា និងអ្នកអាណាព្យាបាល ក្នុងការជ្រើសរើស និងបញ្ចូនបុត្រធីតារបស់លោកអ្នកមកសិក្សាជាមួយសាលារៀន អន្តរទ្វីប អាមេរិកាំងយើងខ្ញុំ។

សាលារៀន អន្តរទ្វីប អាមេរិកាំង គឺជាថ្នាលបណ្តុះបណ្តាលដែលមានចក្ខុវិស័យច្បាស់លាស់លើ “គុណភាព វិន័យ សេវាកម្ម” សម្រាប់សិស្សានុសិស្សមកពីមជ្ឈដ្ឋានផ្សេងៗគ្នាដើម្បីទទួលបានការអប់រំប្រកបដោយ ចំណេះដឹង និងគុណភាពយ៉ាងពិតប្រាកដ។

ខ្ញុំជឿជាក់យ៉ាងមុតមាំថា សិស្សានុសិស្សទាំងអស់នឹងទទួលបានបទពិសោធថ្មីៗជាច្រើនពីសាលា រួមមានចំណេះដឹង ចំណេះធ្វើ ការរៀនរស់នៅជាមួយគ្នា ប្រកបដោយក្រមសីលធម៌ល្អ។ កម្មវិធីសិក្សារបស់សាលារៀន អន្តរទី្វប អាមេរិកាំង ស្របទៅតាមកម្មវិធីរបស់ក្រសួងអប់រំ យុវជន និងកីទ្បាជាគោល។ អ្វីដែលពិសេសលើសពីនេះគឺ សាលារបស់យើងមានកម្មវិធីថ្មីៗបន្ថែមជាច្រើនទៀតសម្រាប់បុត្រធីតារបស់លោកអ្នកដូចជា មុខវិជ្ជាបំណិនជីវិត កម្មវិធីសិក្ខាសាលានានាក្នុង និងក្រៅសាលា ជំនាញកីទ្បាគ្រប់ប្រភេទយ៉ាងច្រើនសម្បូរបែប និងការចូលរួមក្នុងការងារសហគមន៍ដើម្បីទទួលបានបទពិសោធក្នុងជីវិតជាដើម។ សាលារៀន អន្តរទ្វីប អាមេរិកាំង ធានាផ្តល់ជូននូវគុណភាពអប់រំតាមស្តង់ដារខ្មែរ-អាមេរិកាំងដែលផ្តល់ការរីកលូតលាស់ដល់បុត្រធីតារបស់លោកអ្នកតាមលក្ខណៈត្រឹមត្រូវតាមបរិបទថ្មីនៃការរីកចម្រើន​របស់ពិភពលោក។

គណៈគ្រប់គ្រងនិងខ្លួនខ្ញុំផ្ទាល់នឹងប្តេជ្ញាចិត្តយ៉ាងម៉ឺងម៉ាត់ថា ការសិក្សារៀនសូត្រ បទពិសោធការងារ ការបង្រៀនអស់រយៈពេលជាច្រើនឆ្នាំកន្លងមក និងការគ្រប់គ្រងរបស់ខ្ញុំក្នុងការសហការឱ្យអស់ពីសមត្ថភាពជាមួយមាតាបិតា និងអ្នកអាណាព្យាបាល នឹងជួយការអភិវឌ្ឍន៍កុមារ ការការពារកុមារ និងការបង្ហាត់បង្រៀនកុមារបែបវិជ្ជមានក្នុងសតវត្សទី២១ ដើម្បីលើកកម្ពស់សុខុមាលភាពកុមារ និងការអភិវឌ្ឍគ្រប់ផ្នែកទាំងអស់ ដោយផ្អែកលើកម្រិតអាយុ សមត្ថភាព និងភាពខ្លាំង ឬទេព្យកោសល្យពីកំណើតរបស់ពួកគេទទួលបានជោគជ័យនាពេលអនាគត។

វិនិយោគលើការអប់រំ វិនិយោគនៅសាលារៀន អន្តរទ្វីប អាមេរិកាំង

ថ្ងៃទី០៦ ខែវិច្ឆិកា ឆ្នាំ២០២២